Om Swastyastu, ring rahina mangkin, Soma, 19 Pebruari 2024, Kantor Perbekel Desa Tihingan ngemargiang parikrama Bulan Bahasa Bali sane mebantang Jana Kerthi : Dharma Sadhu Nuraga. Ring galahe puniki kamargiang wimbakara Nyurat Aksara Bali (tingkat alit – alit) miwah Wimbakara Masatua Bali (tingkat PKK). Akeh pemilet ring wimbakara Nyurat Aksara Bali dasa diri punika pinaka ngangganin saking soang – soang Dusun sane masekolah ring SD N 1 Tihingan, SD N 2 Tihingan, taler SD N 3 Tihingan. Pamilet ring Wimbakara Masatua Bali akeh nyane limang diri pinaka ngangganin saking soang – soang Dusun ring Desa Tihingan inggih punika Dusun Pau, Dusun Tihingan, Dusun Mungguna, miwah Dusun Penasan.

Parikramane puniki taler kerauhin olih Camat Banjarangkan sane kawakilin sareng Ibu Sekretaris Camat Banjarangkan, Bapak Perbekel Desa Tihingan, Bapak BPD Desa Tihingan, Para Dewan Juri, miwah uleman sane tiosan. Parikramane punika kapungkah olih Bapak Perbekel Desa Tihingan. 

Wimbakara lan utsawane puniki kamargiang mangdane prasida nglestariang Basa, Sastra, miwah Aksara Bali duene. Om Santih, Santih, Santih Om.